29, ఆగస్టు 2017, మంగళవారం

10.c డబ్బు- సరుకు, రెండో రూపపరివర్తన లేదా కొనుగోలు

10.C  డబ్బు- సరుకు,  రెండో రూపపరివర్తన లేదా కొనుగోలు

Second metamorphosis, or purchase

డబ్బు ఏ సరుకుతో నైనా మారకం అవుతుంది
డబ్బుకి మార్కెట్  ఎప్పుడయినా స్వాగతం పలుకుతుంది. ఎర్రతివాసీ పరిచి వుంచుతుంది.ఎందుకంటే డబ్బు  ఎలాటి పరిమితులూ, షరతులూ లేకుండా, ఏసరుకుతోనైనా అప్పటికప్పుడే మారుతుంది. అన్ని ఇతరసరుకులు రూపాంతరం చెందిన ఆకృతే డబ్బు. అది అన్ని ధరలని తిరగదిప్పి చదువుతుంది. ధరలు ఇలా ఉంటాయి:
20 గజాల బట్ట=2 ఔన్సుల బంగారం
1 కోటు =2 ఔన్సుల బంగారం
10 పౌన్ల టీ =2 ఔన్సుల బంగారంfa
40 పౌన్ల కాఫీ =2 ఔన్సుల బంగారం 
పావు ధాన్యం =2 ఔన్సుల బంగారం
అర టన్ను ఇనుం పావు ధాన్యం =2 ఔన్సుల బంగారం వగయిరా.


ధరలని తిరగదిప్పితే:

2 ఔన్సుల బంగారం /2పౌన్లు   =20 గజాల బట్ట =1 కోటు
=10 పౌన్ల టీ =40 పౌన్ల కాఫీ = పావు ధాన్యం =1/2 టన్ను ఇనుం వగయిరా 
ఆవిధంగా  డబ్బుఇతర సరుకుల శరీరాల్లో తననుతాను చిత్రించుకుంటుంది.కాబట్టి డబ్బు దేనితోనైన ఏ షరతులూ లేకుండా మారకం కాగలదు.
డబ్బుకి  ఏ వాసనా అంటదు 
డబ్బుని చూసి అది ఎలా ఒకని చేతిలోకి వచ్చిందో, ఏ సరుకు మారకంఅయినందువల్ల వచ్చిందో, చెప్పడం సాధ్యంకాదు. అది ఎక్కడ నుండి వచ్చినా, దానికి ఏ వాసనా ఉండదు. Pecunia non olet అనేది ఒక రోమన్ సామెత. దానర్ధం ‘ డబ్బుకంపు కొట్టదు’  అని.  నీరో చక్రవర్తి చనిపోయాక, క్రీ.శ 69-79 కాలంలో వెస్పాసియన్ రోమన్ చక్రవర్తిగా ఉన్నాడు. ఆదాయం పెంచడం కోసం పబ్లిక్ పాయఖానాల మీద పన్ను విధించాడు. ఆయన కొడుకు టైటస్ పాయఖానాలమీద పన్ను వెయ్యడమేమిటని  తప్పుబట్టాడు. దానికి వెస్పాసియన్ ‘ డబ్బుకంపు కొట్టదు ’ అన్నాడని  ప్రతీతి. "Money does not stink”. ఎక్కడ నుండి వచ్చినా డబ్బుకి ఏ వాసనా అంటదు. 
డబ్బు అమ్మిన సరుక్కీ, కొనబోయే సరుక్కీ రెంటికీ  ప్రతినిధే
మన చేతిలో ఉన్న డబ్బు ఎలా వచ్చింది? మన సరుకుని అమ్మితే దాని బదులు వచ్చింది. అంటే మన డబ్బు మనం అమ్మిన సరుక్కి ప్రతినిధి. అలాగే మనం ఆడబ్బుతో మరోకసరుకు కొనబోతాం. డబ్బు పోయి సరుకొస్తుంది. కొనబోయే సరుకుకి మన డబ్బు ప్రతినిధి.
ఒకవైపున అమ్మిన సరుకుకి ప్రతినిధిగా ఉంటూనే, మరొకవైపు కొనబోయే సరుకుకి కూడా ప్రతినిధిగా ఉంటుంది. అంటే,డబ్బు అమ్మిన సరుక్కీ, కొనబోయే సరుక్కీ కూడా  ప్రతినిధిగా ఉంటుంది.
 “మన చేతుల్లో ఉన్న డబ్బు మనం కొనబోయే వస్తువులకు ప్రతినిధి అయినట్లయితే, ఆడబ్బు పొందడానికి మనం అమ్మిన వస్తువులకు కూడా ప్రతినిధి అవుతుంది” - Mercier de la Rivière చెప్పాడని ఫుట్ నోట్ ఇచ్చాడు.
ఒక సరుకు అమ్మకంతో, కొన్ని కొనుగోళ్ళు  
ఒక సరుకు ఉత్పత్తిదారుడు ఆఒక్క దాన్నే మారకంలో ఇవ్వగలడు. దాన్నితరచుగా  పెద్ద మొత్తాల్లో అమ్ముతాడు. వచ్చిన డబ్బుతో అవసరమైన సరుకులు కొంటాడు. ఉదాహరణకి, ఒకడు బట్టీ పెట్టి ఇటుకలు కాలుస్తాడు. వాటిని ట్రాక్టర్ ఇంతనో, లారీ ఇంతనో అమ్ముతాడు. అతని సరుకు డబ్బులోకి పరివర్తన చెందుతుంది. దాన్ని పెట్టి కావలసిన కొన్ని సరుకులు తెస్తాడు. అంటే, ఆడబ్బుని భాగాలు చేసి అనేక కొనుగోళ్ళు చేస్తాడు. అమ్మకం ఒకటే అయినా అది అనేక కొనుగోళ్లకు దారితీస్తుంది.   
డబ్బు- సరుకు అనేది  సరుకు- డబ్బు కూడా
డ-స అంటే డబ్బుని సరుకులోకి మార్చడం- కొనడం. అదే సమయంలో అది స-డ కూడా. అంటే సరుకుని డబ్బులోకి మార్చడం- అమ్మడం. ఒక సరుకు చివరి పరివర్తన మరొక సరుకు మొదటి పరివర్తన. మన నేతగానికి సంబంధించి, బట్ట జీవితం తాను 2పౌన్లను తిరిగి మార్చిన బైబిల్ తో ముగిస్తుంది. ఒకవేళ బైబిల్ అమ్మినవాడు నేతగాడిచ్చిన 2 పౌన్లను బ్రాందీ లోకి మార్చాడు అనుకుందాం.అది డబ్బు- సరుకు, బైబిల్-డబ్బు-బ్రాందీ వలయంలో ముగింపు దశ. ఇదే బైబిల్-డబ్బు-బ్రాందీ వలయంలో తొలిదశ.సరుకూ-డబ్బూ కూడా. ఒక సరుకు తుది రూప పరివర్తన భిన్నమైన ఇతర సరుకుల తొలి రూపపరివర్తనల సమూహం అవుతుంది.    
అమ్మేవాడూ—కోనేవాడూ 
సరుకు పూర్తి రూపపరివర్తనని మొత్తంగా చూస్తే, మొదట అది ఒకదాన్నొకటి పూరించుకునే రెండువ్యతిరేక చలనాలతో(స-డ, డ-స ) ఏర్పడినట్లు అగపడుతుంది. సరుకుయొక్క ఈ రెండు విరుద్ధ రూప పరివర్తనలు ఆసరుకు ఓనర్ చేసే రెండు పరస్పర విరుద్ధ సామాజిక చర్యలవల్ల ఏర్పడతాయి. అతను చేసే ఈచర్యలు తిరిగి అతను పోషించే ఆర్ధిక పాత్రల స్వభావాన్ని ముద్రిస్తాయి.అమ్మకం జరిపేవాడుగా, అతను అమ్మకందారుడు; కోనేవాడుగా, అతను కొనుగోలుదారుడు.
సరుకు రూపమూ, డబ్బురూపమూ ఏక కాలంలో ఉంటాయి. అయితే వ్యతిరేక ద్రువాలవద్ద. అందువల్ల కొనుగోలుదారుడికి ఎదురుగా అమ్మకందారుడుంటాడు. అమ్మకందారుడికి అవతలవైపు కొనుగోలు దారుడుంటాడు.
 చలామణీలో పాల్గొనే వాని పాత్ర కూడా మారుతూ వుంటుంది
ఒకసరుకు - అంటే సరుకు నుండి డబ్బులోకి, డబ్బు నుండి వేరొక సరుకులోకి - వరసగా రెండు రూపపరివర్తనలు చెందుతున్నప్పుడు, సరుకు ఓనర్ ముందు అమ్మేవాడుగా, ఆ తర్వాత కోనేవాడుగా మారుతుంటాడు. అందువల్ల అమ్మేవాడుగానో, కోనేవాడుగానో అతని పాత్ర శాశ్వతం కాదు. స్థిరమైనది కాదు. ఒకసారి అమ్మేవాడుగా ఉంటాడు, మరోకసారి కోనేవాడవుతాడు. మొదటి దశలో అమ్మేవాడయితే, రెండో దశలో కొనేవాడవుతాడు. 
మొదటి రూప పరివర్తనలో చివరి అంశం అయిన డబ్బు,అదేసమయంలో  రెండో లావాదేవీకి  మొదటి అంశం. తొలి లావాదేవీలో అమ్మేవాడు ఆవిధంగా రెండో దాంట్లో కోనేవాడవుతాడు; ఈరెండో దాంట్లో మూడోవాడు రంగంలోకోస్తాడు.
ముగ్గురు పాత్రధారులూ నాలుగు అంచులూ  
ఒక సరుకు పూర్తి రూపపరివర్తన(సరుకు-డబ్బు-సరుకు) లోరెండు కదలికలుంటాయి: ఒకటి, సరుకు-డబ్బు; రెండు, డబ్బు-సరుకు.
ఒక సరుకు పూర్తి రూపపరివర్తనని చూస్తే, నాలుగు అంచులు కనబడతాయి, (extremes) ముగ్గురు పాత్రధారులు కనబడతారు.మొదట ఒక సరుకు డబ్బుకి ఎదురుగా వుంటుంది. ఆడబ్బు సరుకువిలువ తీసుకునే రూపం. అది నగదుగా కోనేవాని జేబులో ఉంటుంది. మొదటి రూప పరివర్తనలో చివరి అంశం అయిన డబ్బు,అదేసమయంలో  రెండో లావాదేవీకి  డబ్బు ఆరంభ అంశం. తొలి లావాదేవీలో అమ్మేవాడు ఆవిధంగా రెండో దాంట్లో కోనేవాడవుతాడు; ఈరెండో దాంట్లో మూడోవాడు రంగంలోకోస్తాడు. అతనే మరొక సరుకు అమ్మేవాడు.
ఇక్కడ ఒక ఫుట్ నోట్ ఉంది: ఒప్పందం చేసుకునే వ్యక్తులు ముగ్గురూ వుంటారు. వీళ్ళలో ఒకరు రెండు సార్లు జోక్యం చేసుకుంటారు.-లేట్రాస్నే
ఒకడు పార మరొకరికి (రెండోవానికి) అమ్మాడు. మూడో వాని దగ్గర రోట్టె కొన్నాడు. 
నాలుగు అంచుల గురించి: తొలిదశ స-డ( పార-డబ్బు) ఒక అంచున పార, రెండో అంచున డబ్బు.
రెండో దశ డ-స (డబ్బు-రొట్టె). ఒక అంచున డబ్బు,మరో అంచున రొట్టె. వెరసి నాలుగు అంచులు.
ముగ్గురు వ్యక్తులు: పార అమ్మినవాడు, పార కొన్నవాడు, రొట్టె అమ్మిన వాడు. పార అమ్మినవాడే రొట్టెకొన్నవాడు. అతను రెండు సార్లు జోక్యం చేసుకుంటాడు. 
స - డ - స వలయం (circuit)
ఒక సరుకు పూర్తి రూపపరివర్తనలో రెండు వ్యతిరేక దశలుంటాయి, ఒకటి స-డ అయితే రెండోది డ-స.ఇవి రెండూ కలిసి చక్రీయ చలనాన్ని, ఒక వలయాన్ని ఏర్పరుస్తాయి. 
వలయం ఏమంటే: సరుకు రూపం-ఆరూపాన్ని వదలడం-తిరిగి సరుకు రూపానికి రావడం.
ఇక్కడ సరుకు రెండు భిన్న అంశాల కింద కనబడుతుంది. ఆరంభంలో సరుకు దాని ఓనర్ కి ఉపయోగపు విలువ కాదు, ముగింపులో అది ఉపయోగపు విలువే. మొదట్లో అతను అమ్మిన పార అతనికి ఉపయోగపు విలువ కాదు. కాని చివరలో అతను కొన్న రొట్టె అతనికి ఉపయోగాపువిలువే. అలాగే తొలిదశలో డబ్బు సరుకు తహతహలాడుతూ  ఘనీభవించిన విలువ స్పటికం(crystal) గా కన్పిస్తుంది. రెండో దాంట్లో డబ్బు,  ఒక ఉపయోగపు విలువ చేత తొలగించ బడాల్సిన తాత్కాలిక సమానక రూపంలోకి ద్రవీభవిస్తుంది.

వలయాన్ని ఏర్పరచే రెండు రూప పరివర్తనలూ అదే సమయంలో రెండు ఇతర సరుకుల యొక్క రెండు తలక్రిందయిన (inverse), పాక్షిక రూపపరివర్తనాలు కూడా. ఒకే సరుకు ‘బట్ట’ తన పరివర్తనల వరసని మొదలెడుతుంది, మరోకసరుకు ‘గోధుమ’ రూపపరివర్తనతో ముగిస్తుంది. మొదటి దశ ‘అమ్మకం’లో బట్ట ఈరెండు పాత్రల్నీ తనరూపంలోనే పోషిస్తుంది.అయితే, అప్పుడు బంగారంలోకి మారి తన రెండో,అంతిమ పరివర్తనని పూర్తిచేస్తుంది; అదేసమయంలో మూడో సరుకు తొలి పరివర్తనకి సహకరిస్తుంది. అందుకే ఒకసరుకు ఏర్పరఛిన  వలయం (సర్కూట్) తన పరివర్తనల క్రమంలో ఇతర సరుకుల వలయాలతో విడదీసే వీలులేనివిదంగా  కలగలిసి పోతుంది. ఈ భిన్న వలయాలన్నిటి మొత్తమే సరుకుల చలామణీ. “ఈమొత్తం ప్రక్రియే సరుకుల చలామణీ”
వస్తుమార్పిడీ- చలామణీ
అలా సరుకుల చలామణీ ని చేరుకున్నాక, మార్క్స్  తిరిగి  వస్తుమార్పిడి వైపు చూస్తాడు. చలామణీ వస్తుమార్పిడి నుండి రూపంలోనే కాకుండా, సారంలోకూడా విభేదిస్తుందని నిర్ధారిస్తాడు.ఇందుకు సంఘటనల క్రమాన్ని చూస్తే సరిపోతుంది. నేతగాడు తన సరుకు బట్టని వేరొకరి సరుకు బైబిల్ తో మార్చాడు. ఈవిషయం అతనికి సంబంధించినంత  వరకే వాస్తవం. బైబిల్ అమ్మినవాడు గనక మరేదైనా డ్రింక్ ని మరింత ఇష్టపడే వాడయితే, బట్టకి బైబిల్ ని మార్చడు. అలాగే తనబట్ట గోధుమలతో మారినట్లు నేతగానికి తెలియదు. ఎందుకంటే అతని బట్ట మారింది డబ్బుతో. ఆడబ్బు ఏ సరుకు అమ్మితే  తన బట్ట కొన్నవానిచేతిలో పడ్డదో నేతవానికి తెలియదు.
బైబిల్ వాడు బట్ట కావాలనుకున్నాడు.కనకనే నేతగాడు బట్టని బైబిల్ కి మార్చగలిగాడు. బైబిల్ వాడు బ్రాందీ కావాలనుకొని ఉంటే, బట్టతో బైబిల్ మార్చాలనుకోడు.మన నేతగానికి తన ‘బట్ట’కి మారింది ‘గోధుమ’ అని ఎలా తెలియదో అలాగే.
B సరుకు A సరుకు చోట్లో చేరుతుంది. అయితే A, B లు ఒకరి సరుకుని ఒకరు మారకం చేసుకోరు. అరుదుగా అలా జరగవచ్చు. అటువంటి అసాధారణమైన లావాదేవీలు సరుకుల చలామణీ యొక్క సాధారణ పరిస్థితుల తప్పనిసరి ఫలితం కాదు.ఇక్కడ మనం, ప్రత్యక్ష వస్తుమార్పిడి నుండి విడదీయరాని స్థానిక,వ్యక్తిగత పరిధులన్నిటినీ అధిగమించి సరుకుల మారకం సామాజిక శ్రమ ఉత్పత్తుల చలామణీని అభివృద్ధి చేస్తుందో చూస్తాం.రైతు గోధుమలు అమ్మాడు, కనకనే నేతగాడు బట్టని అమ్మగలిగాడు. నేతగాడు బట్టని అమ్మాడు కనకనే మరొక వ్యక్తి బైబిల్ అమ్మగలిగాడు. అతను బైబిల్ అమ్మాడు కనకనే బ్రాందీ కొనగలిగాడు. అలా ...అలా...అలా.
సరుకుల చలామణీ ప్రత్యక్ష వస్తుమార్పిడికి భిన్నమైన బదిలీ నమూనా ఏర్పరుస్తుంది. వస్తుమార్పిడి లో B అనేవాడు గనక Aఅనేవాడి సరుకుల్నిపొందినట్లయితే, అప్పుడు A,  B సరుకుల్ని పొందుతాడు. ఒకరి సరుకులు మరొకరికి మారతాయి. చలామణీలో అలాకాదు. B అనేవాడు  A అనేవాడి సరుకుల్నిపొందుతాడు, A అనేవాడు  B అనేవాడి సరుకుల్నిపొందడు. డబ్బు పొందుతాడు. దాంతో A అనేవాడు C అనేవాడి సరుకుల్ని  పొందుతాడు....చలామణీలో తను ఇచ్చినవానిదగ్గరే తీసుకోవాలని లేదు.అప్పటికప్పుడే మారకం చేసుకోవాలనే లేదు. అక్కడికక్కడే జరగాలని లేదు.. ఆవిధంగా ప్రత్యక్ష వస్తుమార్పిడికి ఉన్న వ్యక్తిగత, స్థానిక అవరోధాల్ని చలామణీ అధిగమిస్తుంది. మరొకవైపు, ఆర్ధిక ఏ జంట్ల సామాజిక సంబంధం అదుపు లేని దవుతుంది.
ఎప్పుడూ ఎవరో ఒకరిదగ్గర డబ్బు ఉంటుంది
వస్తుమార్పిడికి లేనిదీ, చలామణీ కి ఉన్నదీ ఏమంటే చలామణీ డబ్బుని ప్రతి రంధ్రం నుంచీ చమటలాగా కారుస్తుంది. ఇది దాని రెండో లక్షణం. A, B లు ఇద్దరూ తమతమ సరుకుల్ని మారకం చేసుకుంటే, ఈ లావాదేవీలో పాల్గొన్న అన్ని సరుకులూ చలామణీ నుంచి తప్పుకున్నట్లే. చలామణీలో బైబిల్ బట్ట చోటులో చేరిన అనంతరం నేతగానికి కూడా ఈ లావాదేవీ పూర్తయింది, ఈ ఉత్పాదితాల్ని తొలిగించినట్లే కచ్చితంగా ఉంటుంది. మరొకచోట ఒక మార్పు కూడా జరిగింది: బైబిల్ అమ్మినవాని దగ్గర అంతకు ముందు లేని డబ్బు ఇప్పుడు ఉంది; బట్ట కొన్న వాని వద్ద ఇప్పుడులేని డబ్బు ఇంతకు ముందు ఉంది. ఎప్పుడూ ఎవరో ఒకరిదగ్గర డబ్బు ఉంటుంది. ఈ వాస్తవం ఎప్పటికీ అసంపూర్ణ చలామణీ ప్రక్రియలు ఉంటాయి అనే విషయాన్ని సూచిస్తుంది.  

అందువల్ల వస్తుమార్పిడి లాగా ఉపయోగపు విలువలు చేతులూ, చోట్లూ మారగానే చలామణీ ప్రక్రియ ఆగిపోదు. ఒకసరుకు రూపపరివర్తన వలయం బయటకు రాగానే డబ్బు మాయం అవదు. చలామణీలో ఇతరసరుకులు కాళీచేసిన చోట్లకి డబ్బుఎడతెగకుండా/నిరంతరం  చేరుతూనే ఉంటుంది. ఉదాహరణకి, బట్ట పూర్తి పరివర్తన బట్ట-డబ్బు-బైబిల్. ఇందులో మొదట బట్ట చలామణీ నుండి బయటపడుతుంది, దాని చోటులో  డబ్బు అడుగు పెడుతుంది. తర్వాత బైబిల్ చలామణీ నించి తప్పుకుంటుంది.ఆచోటులోకి డబ్బొస్తుంది. ఒక సరుకుని తొలగించి దాని స్తానంలోకి మరొక సరుకు వచ్చినప్పుడల్లా, డబ్బుసరుకు మరొక మూడో మనిషి చేతుల్లోకి చేరుతుంది. ఫుట్ నోట్ లో: ఇది స్వయం స్పష్టమే అయినాగాని ఆర్ధిక వేత్తలు అనేక సందర్భాలలో ఈవిషయాన్ని గమనించలేదు అంటాడు. 

సరుకుల చలామణీ లో సంక్షోభం వచ్చే అవకాశం 
అమ్మకం కొనుగోలు మధ్యన ఉన్న ఏకత్వం, ద్రువత్వం, ఐక్యతా వైరుధ్యం గురించి చర్చ నడుస్తుంది. ఈమొత్తం చర్చ ఫలితం ఏమంటే: సరుకుల చలామణీ లో సంక్షోభం వచ్చే అవకాశం ఉంటుంది.”ప్రతి కొనుగోలూ ఒక అమ్మకం, ప్రతి అమ్మకమూ ఒక కొనుగోలు కాబట్టి, సరుకుల చలామణీలో అమ్మకానికీ కొనుగోలుకీ సమతుల్యత ఉంటుంది –అనే దాన్ని మించిన పిల్లతరహా పిడివాదం మరొకటి ఉండదు. దీనర్ధం అమ్మకాల సంఖ్య కొనుగోళ్ళ సంఖ్యకు సమానం కావడం అయితే, అది చెప్పిందే చెప్పడం(tautology). ఈవాదం అభిప్రాయం ఏమంటే: అమ్మేప్రతి వాడూ కొనే వాణ్ని మార్కెట్ కి తెచ్చుకుంటాడు అని. అయితే అలా ఏం తెచ్చుకోడు. అటువంటిదేమీ జరగదు.నిజంగా అలా జరిగితే సంక్షోభానికి అవకాశం ఉండదు.
ఈ పిడివాదం చేసినవాడు జీన్ బాప్టిస్ట్ సే (1767 –1832) ఫ్రెంచ్ ఆర్ధికవేత్త, వ్యాపారవేత్త కూడా.
సరఫరాయే తన గిరాకీని ఏర్పరచుకుంటుంది. ఇది  సే (మార్కెట్ల) నియమంగా ప్రసిద్ధి చెందింది. మొత్తం సరఫరా మొత్తం గిరాకీని సృష్టించుకుంటుంది. ఉత్పత్తయిన వన్నీ వినియోగమవుతాయి- అని బ్రిటిష్ ఆర్ధికవేత్త డేవిడ్ రికార్డో(1772- 1823) పలుమార్లు చెబుతాడు.అమితోత్పత్తి సాధ్యం కాదు. సరుకులు సరుకులుతో మారతాయి-అనే ప్రతిపాదన దీనికి ఆధారం..దీని నుంచి వచ్చే నిర్ధారణ: గిరాకీ ఉత్పత్తి వల్ల  మాత్రమే నిర్ణయమవుతుంది. ఉత్పత్తీ గిరాకీ సరిగా సమంగా ఉంటాయి. - TSV2.493 సే నియమాన్ని నిర్ద్వంద్వంగా తోసిపుచ్చుతాడు. సుప్రసిద్ధ బ్రిటిష్ ఆర్ధికవేత్త జేమ్స్ మిల్(1773- 1836) ఇలా చెబుతాడు: సంవత్సర ఉత్పత్తి మొత్తం అది ఎంతైనా కానీ, సంవత్సర గిరాకీ మొత్తాన్ని మించదు.అందువల్ల, ఏ దేశంలోనైనా సరుకు గిరాకీని మించిన పరిమాణంలో ఉండడం అసాధ్యం....క్రిటిక్ 96
మిల్ ఆవిధంగా చలామణీ ప్రక్రియని వస్తుమార్పిడికి కుదించడం ద్వారా సమతుల్యతని సాధిస్తాడు అని మార్క్స్ తప్పుబడతాడు.

ప్రతి అమ్మకమూ ఒక కొనుగోలే, ప్రతి కొనుగోలూ ఒన అమ్మకమే. కనుక సరుకుల చలామణీ లో అమ్మకాలకీ కొనుగోళ్ళకీ మధ్య సమతుల్యత ఉంటుందనుకోవడం ‘పిల్లతరహా పిడివాదం’. జరిగిన అమ్మకాలసంఖ్య,జరిగిన కొనుగోళ్లసంఖ్యకు సమానం అని దీని అర్ధంఅయినట్లయితే,ఇది చెప్పినదాన్నే చెప్పడం(tautology) మాత్రమే.దాని ఉద్దేశ్యం ఏమంటే: ప్రతి అమ్మకందారుడూ తనవెంట కోనుగోలుదారుణ్ణి మార్కెట్ కి తెచ్చుకుంటాడని.అయితే అది జరిగేపని కాదు.
ఈ విమర్శల తర్వాత పరిస్థితిని మరింత వివరంగా పరిశీలిస్తాడు. కొనుగోలూ అమ్మకమూ ఒకేరకమైన చర్యలు, అదే సమయంలో వ్యతిరేక ధ్రువాలు.అయితే ఇది తార్కిక వైరుధ్యం కాదు:’ఒకే రకంగా ఉండడమూ’ ‘వ్యతిరేక ధృవాలుగా ఉండడమూ’ ఇప్పుడు పాల్గోన్నవారికీ,లావాదేవీకీ విస్తరించింది/ పంపిణీ అయింది. అమ్మకమూ కొనుగోలూ ఒకే స్వభావంగల చర్య-సరుకు ఓనర్ కీ డబ్బు ఓనర్ కీ మారకం- అవుతుంది. అయస్కాంతం ధ్రువాల లాగా, ఒకరికొకరు వ్యతిరేకంగా ఉన్న ఇద్దరు వ్యక్తుల మధ్య జరిగే  ఒకేరకమైన చర్య.
ఇద్దరు వ్యక్తుల మధ్య జరిగే ఒకే లావాదేవీ యొక్క రెండు వైపులుగా అమ్మకం కొనుగోళ్లను చూస్తే, ఆ లావాదేవీ అమ్మకమా కొనుగోలా అనే సందిగ్ధత(ambiguity) ఉంటుంది; అది ఒకరికి అమ్మకమూ, మరొకరికి కొనుగోలూ. లావాదేవీలో పాల్గొన్నవారి పాత్రగురించి సందిగ్ధత ఏమీ లేదు: ఒకరు అమ్మకందారుడూ, మరొకరు కొనుగోలుదారుడూ. 
రెండు చర్యల్నీ ఒకే వ్యక్తీ చేస్తే అవి ధ్రువస్వభావమూ, వ్యతిరేక స్వభావమూ ఉన్న  భిన్న చర్యలవుతాయి.  
ఇందుకు భిన్నంగా, ముందు అమ్మి తర్వాత కొనే వాడిని అనుసరిస్తే, ఏ చర్య అమ్మకమో, మరేది కొనుగోలో సందిగ్ధత ఉండదు. అవి ధ్రువ వ్యతిరేకతలు ఏర్పరుస్తాయి.ఏమైనా అతన్ని గురించి చెప్పగలిగేదంతా ఇదే: అతను అమ్మకం దారుడూ, కొనుగోలు దారుడూకూడా. అతను మొదట అమ్ముతాడు, తర్వాత కొంటాడు. చలామణీ అనే గుండం (alchemist’s retort) లోకి సరుకుని విసిరినప్పుడు, అది డబ్బుగా తిరిగి రాకపోతే ఆసరుకు నిరుపయోగమైనదని అర్ధం. అంటే దాని ఓనర్ దాన్ని అమ్మలేకపోతే, అందువల్ల కొనుగోలుదారుడు కొనలేకపోతే ఆసరుకు నిరుపయోగమైనది.  అమ్మకం కొనుగోలుల ఐక్యత తెలిపేది ఈ విషయాన్నే.
ఆసరుకు డబ్బుగా చలామణీ నుండి బయటకి రాకపోతే,అమ్మేవాడికే కాదు, ఎవ్వరికీ పనికిరాదు.
ఒక సరుకుని అంతిమంగా వినియోగదారుని చేతుల్లోకి జరిపే లావాదేవీ అదే సమయంలో ఉత్పత్తిదారుడు ఏర్పరచిన విలువ సిద్ధింపుకూడా. ఈలావాదేవీ రెండు వైపులూ – విలువ సిద్ధింపూ వినియోగదారుడు ఉపయోగపు విలువని ఏమ్చుకోవదమూ- విడదీయరాని బంధంలో ఉంటాయి.ఒకటి లేకుండా రెండోది ఉండదు. విలువలు సిద్ధించడం వీలుకాకుంటే, ఉపయోగపువిలువలు ముక్కిపోతాయి.   

ఈ ఐక్యత మరొక విషయాన్ని కూడా చెబుతుంది: మారకం జరిగినా విరామ సమయం ఏర్పడుతుంది. అది ఆసరుకు జీవితంలో ఎక్కువ కావచ్చు తక్కువా కావచ్చు. మొదటి పరివర్తన ఒకేసారి అమ్మకమూ కొనుగోలూ కావడం వల్ల, అది ఒక స్వతంత్ర ప్రక్రియ కూడా. కొన్నవాని దగ్గర  సరుకుంది, అమ్మినవాని వద్ద డబ్బుంది. అంటే మళ్ళీ ఏ క్షణంలోనైనా చలామణీ లోకి పోవడానికి రెడీగా వుండే డబ్బుంది. 
ఎవరో ఒకరు కొననిదే, ఎవరూ అమ్మలేరు. అయితే ఒకడు తన సరుకులు  అమ్మాడు  కనక ఆడబ్బుతో ఇతరుల సరుకులు  కొని తీరాలనేదేమీ లేదు.
మారకం అమ్మకం,కొనుగోలు గా విడివడడం సాధారణ వాణిజ్య సంక్షోభాలకు అవకాశాన్నిఇముడ్చుకొని ఉంటుంది-క్రిటిక్ 
ఈ చర్యల స్వతంత్రత సే నియమాన్ని చెల్లుబాటు కానివ్వదు తన సరుకుల్ని అమ్మగా వచ్చిన డబ్బుతో అప్పటికప్పుడు కొనాల్సిన అగత్యం ఏమీలేదు. ఎందుకంటే, ఆడబ్బు ఎన్నేళ్ళ తర్వాతయినా కొనుగోళ్ళు చెయ్యగలదు. సేనియమాన్ని తిరస్కరించాక, కొనుగోలు అమ్మకం రెంటి ఐక్యతా, ద్రువత్వాల గురించి చర్సిస్తాడు. అమ్మకమూ కొనుగోలూ విడదీయరాని యూనిట్ గా ఉండకపోవడం, స్తల కాలాలలో వేరు చేయబడడం  మంచిదే.
టైం కి, ప్రదేశానికి, వ్యక్తులకి వస్తుమార్పిడి  విధించిన  అన్ని పరిమితుల్నీ చలామణీ తెంచుకుంటుంది. ఈపని అది ఎలా చెయ్యగలుగుతుంది? అమ్మకం కొనుగోలు లోకి విడిపోవడంద్వారా. ప్రత్యక్ష వస్తుమార్పిడిలో ఒకరి సొంత ఉత్పాదితాన్ని పరాధీనం చెయ్యడానికీ మరొకరి ఉత్పాదితాన్ని పొందదానికీ ఉన్న ప్రత్యక్ష ఐక్యత చలామణీ లో అమ్మకం కొనుగోలు అనే విరుద్ధత లోకి విడిపోవడంద్వారా.
మార్క్స్ ఇక్కడ రెండు విషయాలు చెబుతున్నాడు:
1.అమ్మకమూ కొనుగోలూ ఐక్యతని ఏర్పరుస్తాయి.ఎందుకంటే, అవి మారకప్రక్రియ రెండుగా చీలడంవల్ల ఏర్పడతాయి గనక.
2. ఈవిడివడడం అనేది చలామణీ కాలానికీ, స్థలానికీ, వ్యక్తులకీ సంబంధించిన అన్ని పరిమితులనూ చేదించి, చొచ్చుకొనిపోతుంది. 
ఈ రెండు పాయింట్లకీ ఉన్న సంబంధం ఫ్రెంచ్ కూర్పులో ఇంకొంత స్పష్టంగా ఉంటుంది: అమ్మిన తర్వాత, అదే చోటగానీ, అదే టైం లో, అదే నేను అమ్మిన వ్యక్తివద్దనే గానీ  గానీ కొనాలనే బలవంతం నామీద ఉండదు. ఇది మంచిదే. కాని ఇలావిడివడడం  అనేదానికి లోపం కూడా  ఉంది.
సరుకు సంపూర్ణ రూపపరివర్తనలోని రెండు అనుబంధ దశలకీ –అమ్మకానికీ కొనుగోలుకీ – మధ్య విరామకాలం మరీ ఎక్కువయితే వాటి మధ్య ఉండే బంధం అంటే వాటి ఏకత్వం సంక్షోభం కలిగించడంద్వారా చాటుకుంటుంది.
అంతర్గత ఐక్యతని ఏర్పరచే రెండు అంశాల యొక్క స్వతంత్ర ప్రాతినిధ్యానికి రెండు ఫలితాలుంటాయి:
1. కాలానికీ, స్థలానికీ సంబంధించిన అన్ని పరిమితుల గుండా చలామణీని చొచ్చుకు  పోనిస్తుంది.
2.సంక్షోభాలు వచ్చే అవకాశాన్ని ఇముడ్చుకొని ఉంటుంది.
అయితే సంక్షోభాల వాస్తవికతని  చలామణీ సూత్రాలనించి రాబట్టడం కుదరదు
సరుకులోఅంతర్భూతంగా ఉపయోగపు విలువకూ, విలువకూ మధ్య వ్యతిరేకత ఉంటుంది;
 ప్రత్యక్ష సామాజిక శ్రమగా ఏకకాలంలో తననుతాను వ్యక్తపరచుకోవాల్సిన ప్రైవేట్ శ్రమకీ, సార్వత్రిక అనిర్దిష్ట శ్రమగా మాత్రమే లెక్కకొచ్చే ఒక ప్రత్యేక నిర్దిష్ట తరహా శ్రమకీ మధ్య  విరుద్ధత ఉంటుంది;
 వస్తువుల్ని వ్యక్తులుగా చూడడానికీ,వ్యక్తుల్ని వస్తువులుగా చూడడానికీ మధ్య వైరుధ్యం ఉంటుంది.
ఈ అంతర్గత వైరుధ్యం అభివృద్ధి చెందిన చలన రూపాల్ని, సరుకు రూప పరివర్తనలోని వ్యతిరేక దశలలో పొందుతుంది.
అందువల్ల ఈరూపాలు సంక్షోభాలు వచ్చేఅవకాశాన్ని ఇముడ్చుకొని ఉంటాయి. కేవలం అవకాశాన్ని మాత్రమే. అంతకెక్కువ కాదు.
అవకాశం వాస్తవం లోకి అభివృద్ధి చెందాలంటే, ఒకమొత్తం సంబంధాల పరంపర అవసరం. సరుకుల సరళ చలామణి దృష్ట్యా ఆపరంపరకి ఇప్పటికింకా ఉనికిలో లేదు. 
సంక్షోభం ఎందుకేర్పడుతుంది?
సరుకుల ఉత్పత్తిలో సరుకుని అమ్మడం అనేది తప్పనిసరి షరతు...అమ్మడం అసాద్యం అయితే, దాని ఫలితమే సంక్షోభం- అదనపు విలువ సిద్ధాంతాలు భాగం 2.509
 పెట్టుబడి దారీ విధాన సమర్ధకులు అనివార్యతని అంగీకరించరు. సమర్ధకులు వాళ్ళ పుస్తకాల ప్రకారం ఉత్పత్తి చేస్తే  సంక్షోభాలు సంభవించవంటారు. అంటే ఏవో పొరపాట్లవల్ల వస్తాయనీ, సరిదిద్దుకోగానే సర్దుకుంటాయనీ వాదిస్తారు.
సరుకు డబ్బుగా మారితీరాలి, కాని డబ్బు వెంటనే సరుకులోకి మారాల్సిన అవసరం లేదు.అందువల్ల కొనుగోలూ అమ్మకం విడిపోవచ్చు. ఈరూపం లో సంక్షోభానికి అవకాశం ఉంది. అంటే, కలిసిఉన్న,విడివడే వీలులేని అంశాలు విడదీయ బడ్డాయి, ఫలితంగా బలవంతంగా తిరిగి కలపబడ్డాయి. వాటి పొందిక వాటి పరస్పర స్వతంత్రతకి వ్యతిరేకంగా బలవంతంగా ప్రకటించ బడింది.  సంక్షోభం అనేది ఉత్పత్తిప్రక్రియలో పరస్పరం స్వతంత్రమైన అంటే విడివడిన  అంశాల ఐక్యత యొక్క బలవంతపు వక్కాణింపు తప్ప వేరేమీ కాదు. - అదనపు విలువ సిద్ధాంతాలు భాగం 2.509
అమ్మకమూ,కొనుగోలూ  ఒకదానినుండి మరొకటి విడిపోయి, ఘర్షణ పడక పొతే సంక్షోభం ఉండదు.512
సంక్షోభాల్ని తిరస్కరించడానికి, సమర్ధకులు వైరుధ్యం, ఘర్షణ ఉన్నచోట ఐక్యత ఉన్నది అని నొక్కివక్కాణిస్తారు. వాస్తవంగా ఉన్న వైరుధ్యాల్ని లేవనుకుంటారు.ఉండకూడదు అనుకుంటారు.- అదనపు విలువ సిద్ధాంతాలు భాగం 2. 513 
సంక్షోభాలకు మూలం ఎక్కడ ఉందో తేల్చి చెప్పాడు. అవి ఎదో  యాదృచ్చికంగా వచ్చిపోయేవి కావు. ఉత్పత్తిదారులు పొరపాట్ల వల్ల ఏర్పడేవికావు. పెట్టుబడిదారీ విధానంలో అనివార్యమైనవి. ఇకముందు రావు అని పలుమార్లు ప్రకటించారు. అయినా వస్తూనే ఉన్నాయి.మొదటి సార్వత్రిక సంక్షోభం మార్క్స్ కాలంలో వచ్చింది.
వాళ్ళ పుస్తకాల్ని అనుసరిస్తున్నా, ప్రభుత్వాలు అత్యుత్సాహంతో సహకరిస్తున్నా పదే పదే ఎందుకు వస్తున్నాయి?ఇందుకు మూల కారణమేదో మార్క్స్ సిద్ధాంతపరంగా తేల్చిచెప్పాడు. అమ్మకమూ,కొనుగోలూ  ఒకదానినుండి మరొకటి విడిపోయి, ఘర్షణ పడక పొతే సంక్షోభం ఉండదు- అదనపు విలువ సిద్ధాంతాలు భాగం 2.512
 అమ్మకమూ కొనుగోలూ విడివడ్డాయి.ఎందువల్ల?మారకాల అభివృద్ధికి అది అవసరం. అందువల్ల సంక్షోభాలు అనివార్యం. 
‘డబ్బు చలనం’ గురించి వచ్చే పోస్ట్  

24, ఆగస్టు 2017, గురువారం

10 B'.సరుకు – డబ్బు'. మొదటి రూపాంతరం లేదా అమ్మకం

రుకు – డబ్బు. మొదటి రూపాంతరం లేదా అమ్మకం
C M. First metamorphosis, or sale


ఉత్పత్తయిన సరుకు అమ్ముడవాలి. బంగారంలోకి మారాలి.అంటే ఆ సరుకు ‘విలువ’ ఆ సరుకు శరీరం లోనుంచి బంగారం శరీరం లోకి దూకాలి. దూకితేనే అమ్మకం. ఉదాహరణకి, 50 పౌన్ల ఇనుం అమ్ముడవడం అంటే దాని విలువ 2 ఔన్సుల బంగారంలోకి దూకడమే. దూకకపోతే అమ్మకం జరగనట్లే. మార్క్స్ఈ దుముకుని తాను మరొకచోట  ‘salto mortale of the commodity  అని అన్నానంటాడు. ఆ మరొక చోటు ‘క్రిటిక్’ పేజి 88. అక్కడిలా అంటాడు:
ఈ పరివర్తన జరగకపోతే టన్నుఇనుమూ సరుకు అవకుండా పోతుంది, అంతేకాదు ఉత్పాదితం కూడా కాకుండా పోతుంది. కారణం: దాని ఓనర్ కి ఉపయోగపు విలువ కాకుండా ఉండి, ఇతరులకు ఉపయోగపు విలువ అయితేనే  అది సరుకు. అంటే, అతని శ్రమ ఇతరులకు ప్రయోజనకర శ్రమ అయితేనే అది నిజమైన శ్రమ. అది అనిర్దిష్ట సాధారణ శ్రమ అయితేనే ఓనర్ కి ప్రయోజనకరం. అందువల్ల ఇనుం ఓనర్ తన సరుకు బంగారాన్ని ఆకర్షించగల -అంటే బంగారంతో మారగల- చోటు వెతుక్కోవాల్సి ఉంటుంది. ఈ సింపుల్ చలామణీ విశ్లేషణలో మనం  ఆశించినట్లు అమ్మకం జరిగితే, అవరోధాన్ని  (the salto mortale of the commodity)అధిగమించినట్లే.”
ఈ అన్యాక్రాంతం అవడం  – అంటే, ఉపయోగపు విలువ కాని వ్యక్తినుండి ఉపయోగపు విలువగా ఉండే వ్యక్తికి బదిలీ కావడం-ఫలితంగా ఇనుం వాస్తవంగా ఉపయోగపువిలువ అయినట్లు రుజువు చేసుకుంటుంది; అదే సమయంలో దాని ధర సిద్ధిస్తుంది, కేవలం ఉహాత్మక బంగారం నిజమైన బంగారం లోకి మారుతుంది.-క్రిటిక్

salto mortale (సాల్టో మోర్టాలే) ఇది ఇటాలియన్ మాట. salto అంటే ‘దుముకు’. mortale అంటే ప్రమాదకరమైన . రెండూ కలిపితే, ప్రమాదంతోకూడిన, సాహసోపేతమైన దుముకు అని అర్ధం. సర్కస్ లో తాడుమీద పరిటీలు కొట్టడం ఒక salto mortale. గ్లోబులో మోటార్ సైకిళ్ళు నడపడం అలాంటిదే.ఒక ఎత్తైన చోట నుంచి మరొక ఎత్తైన చోటుకి మోటార్ సైకిల్ ఎక్కి దూకడం ఒక ఫీట్. సరిగ్గా దూకాలి. ఏమాత్రం ఇవతల దూకినా ఎత్తునుంచి కింద పడడమే, ప్రమాదమే.
ఇక్కడ ఒక సరుకు లోంచి విలువ మరోకసరుకులోకి దూకే చర్య. సరుకు విలువ బంగారంలోకి సరిగ్గా దూకాలి. దూకలేకపోతే ప్రమాదం. అయితే ఆ ప్రమాదం సరుకుకి కాదు. కాని దాని ఓనర్ కి కచ్చితంగా ప్రమాదమే. ఎందుకంటే, అది అమ్మకంకోసం ఉత్పత్తయిన సరుకు. అమ్ముడవకపోతే, ఉన్నదలానే, అతని వద్దే ఉండిపోతుంది. మరల తయారు చెయ్యలేడు. అదే అతనికి పొంచివున్న ప్రమాదం.

సరుకు ఉత్పత్తిదారులు శ్రమవిభజన ఉన్న సమాజంలో జీవిస్తారు. తమ ఉత్పాదితాల్ని తామే వాడుకోలేరు. పైగా వాళ్లకి ఇతరుల ఉత్పాదితాలు ఎన్నో  అవసరమవుతాయి. వాళ్ళ ఉత్పాదితం వాళ్లకి కేవలం మారకంవిలువ మాత్రమే, అంటే రకరకాల ఇతరుల సరుకులకు మారకం వేసుకునేవే. సరుకుల ఉత్పత్తిదారులు వాటిని డబ్బులోకి మార్చుకొని తీరాలి.
ఆడబ్బు వేరేవారి జేబులో ఉంటుంది. ఆడబ్బుని బయటకు లాగాలంటే మనమిత్రుని సరుకు డబ్బు ఓనర్ కి ఉపయోగపు విలువ అయి ఉండడం ముఖ్యం. అందుకు దాని ఉత్పత్తికి వ్యయించిన శ్రమ సామాజికంగా ప్రయోజనకరమైన రకానికి చెందినదై, సామాజిక శ్రమ విభజనలో ఒక విభాగమై ఉండాలి.
అయితే శ్రమ విభజన ఉత్పత్తిదారుల ఎరుకలేకుండా ఎదిగిన ఉత్పత్తి వ్యవస్థ, ఎదుగుతున్న వ్యవస్థ. అయితే మార్కెట్ అనిశ్చితులు ఏర్పడడానికి కారణం  పద్ధతీ, ప్రణాళికా, సమన్వయమూ  లేకపోవడం.
 సరుకు అమ్ముడుపోని అంటే కొనేవాడు దొరకని పరిస్థితులు:
  • ·         మారకం కావాల్సిన సరుకు, కొత్తగా ఏర్పడ్డ అవసరాల్ని తీర్చేందుకంటూ వచ్చిన  కొత్తరకం  శ్రమ ఉత్పాదితం కావచ్చు. కొత్త అవసరాలను తానే కలిగించేదీ కావచ్చు. అయితే దాన్ని ప్రయోజనకర వస్తువుగా  వినియోగదారులు గుర్తించకపోవచ్చు. కరెంట్ నిరంతరాయంగా ఉన్న చోట్ల ఇన్ వర్టర్లు అవసరం ఉండదు. ఆపరిస్తితుల్లో కొనే వారు దొరకరు.
  • ·         నిన్నటిదాకా ఒక సరుకు ఉత్పత్తిలో ఉత్పత్తిదారుడు నిర్వహించిన అనేక క్రియల్లో ఒకటి  ఇవ్వాళ   వేరుపడవచ్చు. అంటే ఒక స్వతంత్ర శ్రమ విభాగంగా ఏర్పడవచ్చు. మొత్తంగా లేని   ఉత్పాదితాన్ని స్వతంత్రమైన సరుకుగా మార్కెట్లో కి దించవచ్చు.  అయితే అలా విడిపోవడానికి అప్పుడున్న పరిస్థితులు అనుకూలంగా ఉండవచ్చు. ఉండక పోనూవచ్చు.  ఉండకపోతే, అది అమ్ముడవదు. టీ.వీ బోర్డ్ లో చాలా భాగాలుంటాయి.  ఏది పనిచేయక పోతే దాన్ని మార్చాలి. అయితే మొత్తం బోర్డే మారుస్తున్న పరిస్తితులో, విడిభాగాలు అమ్ముడుపోవు.    
  • ·         ఇవ్వాళ ఒక సరుకు సామాజిక అవసరాన్ని తీర్చేదే కావచ్చు.రేపు అటువంటిదే మరొక సరుకు ప్రత్యామ్నాయంగా వచ్చి పాతదాన్ని పాక్షికంగానో, సంపూర్ణంగానో తొలగించవచ్చు. ఒకప్పుడు వీడియో కాసెట్స్ కి  ఎంత గిరాకీ ఉండేదో! వాటికి ప్రత్యామ్నాయంగా  సీ.డీ లొచ్చాయి. ఇప్పుడు హవా అంతా మెమరీ కార్డులడీ, పెన్ డ్రైవ్ లదీ. పాతకాలపు సరుకులు మార్కెట్లో కదలవు.
  • ·         మన నేతగాని శ్రమ సామాజిక శ్రమ విభజనలో గుర్తింపు ఉన్నదే. ఆగుర్తింపు అతని 20గజాల బట్ట ప్రయోజనానికి హామీగా సరిపోదు. కారణం: ఆసమాజానికి కావలసిన బట్ట పరిమాణానికి ఒక పరిమితి ఉంటుంది – అన్ని ఇతర వస్తువులకూ ఉన్నట్లే. పోటీ నేతగాళ్ళు కొంతమంది ఉంటారు. వాళ్ళ బట్టతో నిండి మార్కెట్ అవసరం పూర్తిగా తీరిపోతే, మన మిత్రుని బట్టతో అవసరముండదు. ఫలితంగా అది నిరుపయోగమై పోతుంది.వృధా అవుతుంది. బహుమతిగా వచ్చిన గుర్రం వయసు తెలుసుకోవడానికి  దాని నోరు తెరిచి చూడరు. కాని మన మిత్రుడు మార్కెట్ కి తరచుగా పోయేది బహుమతులివ్వడానికి కాదు గదా! అతని ఉత్పాదితం నిజమైన  ఉపయోగపు విలువ అయిందనీ, డబ్బుని ఆకర్షించిందదనీ అనుకుందాం. ఇప్పుడు ఒక ప్రశ్నపడుతుంది-ఎంత డబ్బుని ఆకర్షిస్తుంది?అనేదే ఆ ప్రశ్న. ఇది పరిమాణానికి సంబంధించిన ప్రశ్న.(అది ఉపయోగపు విలువా కాదా అనేది గుణానికి సంబంధించిన ప్రశ్న). ఆసరుకు  విలువ పరిమాణం ముందుగానే ధరగా ఉహించ బడింది. ప్రతి సరుకుకీ ధర చీటీ ఉంటుంది. అయితే, ఉత్పత్తిదారుడు ఆశించిన ధరకీ  మార్కెట్లో వచ్చేదానికీ తేడా ఉండవచ్చు. అందుకు తగిన కారణాలు ఎన్నో ఉంటాయి.
  • ·         సరుకు ఉత్పత్తి దారుడు ధరని నిర్ణయించడంలో పొరపాటు పడితే, దాన్ని మార్కెట్ సవరిస్తుంది. అందుకని మార్క్స్ ఆవిషయాన్నివదిలేస్తాడు.
  • ·         సరుకు సగటు పరిస్తితుల్లో ఉత్పత్తి కాకపొతే, ఆ సరుకులో చేరిన శ్రమ మొత్తానికీ మార్కెట్ ప్రతిఫలం ఇవ్వకపోవచ్చు. మార్క్స్ దీన్ని కూడా వదిలేస్తాడు- అతను సామాజికంగా అవసరమైన శ్రమనే తనసరుకు ఉత్పత్తిలో వినియోగించాడని అనుకుందాం అంటాడు. అప్పుడు ధర అనేది ఆసరుకులో వస్తుత్వం చెందిన సామాజికంగా అవసరమైన శ్రమ పరిమాణానికి డబ్బు పేరు,అంతే. అంటే, ఆధరని ఒప్పుకుంటుందనా? ఆమోదించని పరిస్థితులు రెండు చూపిస్తాడు:
  • ·         ఒక సరుకు సగటు పరిస్థితుల్లో తయారయినప్పటికీ, ఇతర ప్రాంతాల్లో ఉత్పత్తి పరిస్థితుల్లో మార్పులు రావచ్చు. అంటే అతను వ్యక్తిగతంగా  అంతా సవ్యంగానే చేసినా, అనిర్దిష్ట శ్రమ అనేది సామాజిక భావన అని ఉత్పత్తిదారునికి గుర్తు చేస్తుంది. నేత పనిలో నేతగానికి తెలియకుండా, అతని అనుమతి లేకుండా  పాత నేత విధానం మారవచ్చు. నిన్నఒక గజం బట్ట నేయ్యడానికి  సామాజికంగా అవసరమైన శ్రమ కాలం పరిమాణం ఇవ్వాళ అంతే కాకపోవచ్చు. మారవచ్చు. ఈ వాస్తవాన్ని డబ్బున్నవాడు మన మిత్రుని పోటీ నేతగాళ్ళు చెప్పే ధరలనుండి రుజువు చెయ్యడానికి తొందరపడతాడు. మన నేతగాని దురదృష్టం కొద్దీ, నేతగాళ్ళు తక్కువమంది కారు, చాలామంది ఉన్నారు.
  • ·         ఇకపోతే,ఎక్కువగా ఉత్పత్తయినప్పుడు అందరు ఉత్పత్తిదారులూ ధరలు తగ్గించుకోవాల్సిన పరిస్తితి తలెత్తుతుంది. మార్కెట్ లో ప్రతి బట్ట ముక్కలోనూ సామాజికంగా అవసరమైన శ్రమ కాలానికి మించి లేదనే అనుకుందాం. అలా అయినాగాని, అన్ని బట్టముక్కల్నీ కలిపి మొత్తంగా చూస్తే వాటికి వ్యయించిన స్రమకాలం అధికంగా ఉండవచ్చు. గజం 2షిల్లింగుల లెక్కన మొత్తం బట్టని మార్కెట్ ఇముడ్చుకోలేక పోవచ్చు. అప్పుడు సామాజిక శ్రమలో మితిమీరిన భాగం నేతరూపంలో వ్యయమయినట్లు రుజువవుతుంది. దీని ప్రభావం ప్రతి నేతగాడూ సామాజికంగా అవసరమైన శ్రమని మించి వ్యయించి నప్పుడు కలిగే  ప్రభావం వంటిదే. మనం ఇక్కడ జర్మన్ సామెతతో గొంతు కలపవచ్చు: ‘కలిసికట్టుగా పట్టుకోబడ్డారు, కలిసికట్టుగా ఉరితీయబడ్డారు’. మార్కెట్లో ఉన్న మొత్తం  బట్ట ఒకే వర్తక వస్తువుగా లెక్కకొస్తుంది. అందులో ప్రతి ముక్కా తగిన భాగం  అంతే. వాస్తవానికి ప్రతి గజం విలువా సామాజికంగా నిర్ణయమైన ఒకేరకమైన మానవశ్రమ పరిమాణం యొక్క వస్తు రూపం తప్ప వేరేమీ కాదు.

ఆవిధంగా సరుకుని అమ్ముకోవడంలో ఉన్న ఇబ్బందుల్ని చెప్పాక, వాటినించి ఈక్రింది నిర్ధారణకి వస్తాడు:
సరుకులు డబ్బుపట్ల ప్రేమలో ఉంటాయి. కాని నిజమైన వలపు తిన్నగా సాగదు. శ్రమ యొక్క గుణాత్మక విభజన లాగానే, పరిమాణాత్మక విభజన కూడా స్వయంజనిత, యాదృచ్చిక సరళిలో  సంభవిస్తుంది.
అందువల్ల, తమను స్వతంత్ర వ్యష్టి ఉత్పత్తిదారులుగా చేసిన శ్రమ విభజనే, సామాజిక ఉత్పత్తి ప్రక్రియనీ, ఆప్రక్రియ లోపల విడివిడి  ఉత్పత్తిదారుల పరస్పర సంబంధాల్నీ, ఆ యా ఉత్పత్తిదారుల  ఇష్టం మీద ఆధారపడి ఉండడం నుండి విముక్తి చేస్తుంది అనే విషయాన్ని ఉత్పత్తిదారులు తెలుసుకుంటారు. పైకి కనబడే వ్యక్తుల పరస్పర స్వేచ్ఛ తోపాటుగా  ఉత్పాదితాల ద్వారా సాధారణ పరస్పరం ఆధారపడడం అనే వ్యవస్థ అంటిపెట్టుకొని ఉంటుంది అనికూడా తెలుసుకుంటారు.
సరుకు డబ్బులోకి మారడం యాదృచ్చికం
శ్రమ విభజన శ్రమ ఉత్పాదితాన్ని సరుకులోకి మారుస్తుంది. తద్వారా ఆసరుకు ఆతర్వాత డబ్బులోకి మారడాన్ని అవసరపరుస్తుంది. అదేసమయంలో మారుతుందా లేదా అనేది యాదృచ్చికం. ఈవిషయాన్ని స్వచ్చమైన రూపంలో పరిశీలిస్తున్నాం. కనుక మనం అంతా మామూలుగానే జరుగుతున్నట్లు భావిస్తాం.అంతేకాక, రూపంతరీకరణ జరిగితే, అంటే సరుకు అమ్మకానికి పూర్తిగా అనర్హం కాకపొతే, ఈరూపాంతరీకరణ జరుగుతుంది – సిద్ధించిన ధర సరుకు విలువకంటే  అసాధారణంగా ఎక్కువో, తక్కువో అయినప్పటికీ.
సరుకు-డబ్బు అనేది డబ్బు-సరుకు కూడా
అమ్మినవానికి సరుకు బదులు డబ్బొస్తుంది. కొన్నవానికి డబ్బు పోయి సరుకొస్తుంది. ఇక్కడ ఒక విషయం కొట్టొచ్చినట్లు కానొస్తుంది. ఏమంటే, ఒక సరుకూ, డబ్బూ 20 గజాల బట్టా 2 పౌన్లూ చేతులు మారాయి. చోట్లు మారాయి. అంటే అవి మారకం అయ్యాయి. అయితే, సరుకు దేనితో మారింది? తనసొంతవిలువ ఏ రూపాన్ని తీసుకున్నదో దానితో, ఆ సార్వత్రిక సమానకంతో. మరి డబ్బు మారింది దేనితో? దాని సొంత ఉపయోగపు విలువయొక్క ఒకానొక ప్రత్యేక రూపంతో.(బంగారం ఉపయోగపువిలువకి  ప్రతిసరుకూ ప్రత్యేకరూపమే)
బట్టకు ఎదురుగా ఉన్నప్పుడు, బంగారం డబ్బు రూపాన్ని ఎందుకు తీసుకుంటుంది? ఎందుకంటే, బట్ట ధర 2 పౌన్లు. బట్ట ఇప్పటికే డబ్బుస్వభావంతో  ఉన్న  బంగారంతో సమానమైనదిగా పరిగణించబడింది.
ఒకసరుకు డబ్బులోకి మారడం అనేది అదే సమయంలో డబ్బు సరుకులోకి మారడం కూడా. పైకి ఒకేప్రక్రియగా ఉండేది, వాస్తవానికి ద్వంద్వ ప్రక్రియ. సరుకు సొంతదారుని వైపునించి చూస్తే అది అమ్మకం.అవతలవైపు నించి అంటే డబ్బువాని వైపునించి చూస్తే అది కొనుగోలు. అంటే అమ్మకం ఒక కొనుగోలు కూడా. సరుకు-డబ్బు అనేది డబ్బు-సరుకు కూడా.*

కొనేవాడికి డబ్బు ఎక్కడ నుండి వచ్చింది?

‘సరుకు-డబ్బు’  నించి ‘డబ్బు-సరుకు’ పరివర్తనని డబ్బు-సరుకు దృష్ట్యా కాకుండా ‘సరుకు ఓనర్’  ‘డబ్బు ఓనర్’ దృష్ట్యా చూస్తే, ఒక ప్రశ్నతలెత్తుతుంది: కొనేవాడికి డబ్బు ఎక్కడ నుండి వచ్చింది?
ఇంతదాకా మనుషుల్ని సరుకుల ఓనర్లుగా మాత్రమే పరిగణించాం. వాళ్ళుతమతమ శ్రమ ఉత్పాదితాల్ని పరాధీనం చేసి,  ఇతరుల శ్రమ ఉత్పాదితాల్నిస్వాయట్టం చేసుకోగలరు. అందువల్ల, ఒక సరుకు ఓనర్ మరొకసరుకు, డబ్బు  ఓనర్ ని కలుసుకోవడానికి, ఆరెండో(కొనే) వాని శ్రమ ఉత్పాదితం డబ్బు( అంటే బంగారం) అయి ఉండాలి. లేదా అతని ఉత్పాదితం అప్పటికే అసలు రూపం అయిన ప్రయోజనకర వస్తువు నుండి తొలగించబడి  అన్నా ఉండాలి. డబ్బుపాత్ర పోషించడానికి బంగారం ఏదో ఒక సమయంలో మార్కెట్లోకి ప్రవేశించి ఉండాలి.
ఆసమయం ఏది? బంగారం ఉత్పత్తయిన చోట, అది శ్రమ ఉత్పాదితంగా అంటే విలువ ఉన్న  మరొక ఉత్పాదితంతో   వస్తుమార్పిడి అయిన చోట. ఆక్షణం నుండీ ఒక సరుకు యొక్క సిద్ధించిన ధరకి ప్రతినిధిగా ఉంటుంది. ఉత్పత్తయిన చోట ఇతర సరుకులతో మారకం కావడానికి తోడు, బంగారం ఎవరి చేతుల్లో ఉన్నా, అది ఏదో సరుకు ఓనర్ పరాధీనం చేసిన సరుకు యొక్క మారిన రూపం. అది అమ్మకం మొదటి పరివర్తన అయిన ‘సరుకు- డబ్బు’ వచ్చింది. ఇంతకూ ముందే చూసినట్లు బంగారం ఉహాత్మక డబ్బులేక విలువల కొలమానం అయింది- అన్ని సరుకులూ తమ విలువల్ని బంగారం ద్వారా కొలవడం వల్ల, ఆవిధంగా ప్రయోజనకర వస్తువులుగా వాటి ఆకారం నుండి ఉహాత్మకంగా వేరుచేసుకోవడం వల్ల, వాటి విలువ రూపంగా చేసుకోడం వల్ల, అది ఉహాత్మక డబ్బు అయింది.
ఉహాత్మక డబ్బు నిజమైన డబ్బు ఎలా అయింది?
డబ్బు కాక మిగిలిన సరుకు ఏదయినా అమ్మేవానికి ఎలా వస్తుంది? ఆటను ఆసరుకుని ఉత్పత్తిచేసాడు కనుక. బంగారం విషయం వేరు.బంగారం ఉత్పత్తిదారుల మొదటి అమ్మకం మార్కెట్లో ఉండే బంగారంలో కొద్ది భాగమే. మార్కెట్లో పాల్గొనే ఎక్కువ మంది జేబుల్లో ఉండే డబ్బు వారివారి సొంత ఉత్పాదితాలను అమ్మి పొందినదే.
సరుకుల పరాదీనం ద్వారా, ప్రయోజనకర వస్తువులుగా వాటి సొంత రూపాలతో వాస్తవంగా చోట్లు మారడం ద్వారా. ఆవిధంగా నిజంగా వాటి విలువల ఆకారం అయింది. అలా బంగారం నిజమైన డబ్బు అయింది. ఎప్పుడయితే సరుకులు డబ్బు రూపం పొందుతాయో, అప్పుడు అవి వాటి ప్రాకృతిక ఉపయోగపు విలువ యొక్క ప్రతి జాడనూ, వాటిని ఉత్పత్తిచేసిన ప్రయోజనకర శ్రమ జాడనూ వదిలించుకుంటాయి- ఒకేరకమైన,సామాజికంగా గుర్తింపు పొందిన శ్రమగా అవడానికి.
కొంత డబ్బుని చూసినంత మాత్రాన  అది ఏసరుకుకు బదులుగా వచ్చిందో చెప్పలేం. అన్ని సరుకులూ వాటి డబ్బు రూపంలో ఒకేరూపంలో (alike)కనబడతాయి.
అంతకుముందే తన సరుకు అమ్మినందువల్లనే, సాధారణంగా కొనేవానిచేతికి డబ్బోచ్చింది.
మన నేతగాడు బట్టని అమ్మగా రెండు బంగారం ముక్కలు వచ్చాయి. బట్టకోన్నవానికి ఎక్కడనుమ్డి వచ్చాయి? అవి బహుశా అతను ఒక పావు గోధుమలు అమ్మగా  వచ్చి ఉండవచ్చు.
బట్ట అమ్మకం,(సరుకు- డబ్బు), అదే సమయంలో దాని కొనుగోలు (డబ్బు-సరుకు) కూడా. బట్ట అమ్మకంగా చూస్తే, ఈ ప్రక్రియ మొదలు పెట్టిన కదలిక దాని వ్యతిరేక లావాదేవీతో ముగుస్తుంది. అంటే బైబిల్ కొనుగోలుతో ముగుస్తుంది. మరొకపక్క బట్ట కొనుగోలు, దానికి వ్యతిరేకమైన గోధుమల అమ్మకంతో మొదలైన కదలికని  ముగిస్తుంది. స-డ-స (బట్ట-డబ్బు-బైబిల్) కదలికలో మొదటి దశ అయిన సరుకు- డబ్బు(బట్ట-డబ్బు) అనేది, మరొక కదలిక  స-డ-స (బట్ట-డబ్బు-బైబిల్) లో డ-స (డబ్బు-బట్ట)అనేది వేరొక కదలిక (గోధుమలు-డబ్బు- బట్ట) యొక్క చివరి దశ. అందువల్ల,  ఒక సరుకుయొక్క  మొదటి రూపాంతరం/రూప పరివర్తన అంటే సరుకు డబ్బుగా మారడం అనేది  తప్పకుండా మరొక సరుకు యొక్క రెండో రూపపరివర్తన కూడా. మరొక సరుకు పునః పరివర్తన అంటే డబ్బునుండి సరుకులోకి మారడం.
ఇంతకూ ముందే చెప్పినట్లు, బంగారం వెండి వాస్తవ ఉత్పత్తిదారుడు ఇందుకు మినహాయింపు. అతని ఉత్పాదితాన్ని మరొక సరుకుతో మారకం చేసుకుంటాడు –ముందుగా  దాన్ని అమ్మకుండానే.
‘డబ్బు-సరుకు’ రూపాంతరం గురించి  వచ్చేపోస్ట్  



20, ఆగస్టు 2017, ఆదివారం

10. A. సరుకుల రూపపరివర్తన (The Metamorphosis of Commodities)

భాగం 3. డబ్బు లేదా  సరుకుల చలామణీ
 (Money, or the Circulation of Commodities)
విభాగం 2  చలామణీ మాధ్యమం                                                          (The Medium of Circulation)
A. సరుకుల రూపపరివర్తన (The Metamorphosis of Commodities)
సరుకుల సమాజంలో సరుకుల  మారకాలు స్తంభించడమే  సంక్షోభం. మారకాలు సజావుగా సాగించ గలిగినంత కాలం సంక్షోభం ఉండదు. కొన్ని ఆటంకాలు కలిగినా, వాటిని దాటే రూపం మార్పు రావచ్చు.
సంక్షోభాన్ని కలిగించే స్థాయికి చేరకుండా వైరుధ్యాలు పక్కపక్కనే కొనసాగ గలిగే మార్గాలు దొరికితే అవి అంత వరకూ తమ్ముతాము సమన్వయ పరుచుకుంటాయి. సర్దుబాటు చేసుకుంటాయి. వైరుధ్యం తననుతాను వాస్తవం చేసుకోడానికి కావలసిన రూపం: అన్ని విరుద్ధ అంశాలూ తమతమ  ఉనికిని చాటుకోవాలి. దీన్నిబట్టి, అడుగున వుండే వైరుధ్యం అంటిపెట్టుకునే ఉంటుందన్నమాట. కనుక  ఈ వాస్తవీకరణ వైరుధ్యాన్ని తోసిసివేయదు. ఒకరూపంలో విరుద్ధ అంశాలూ చలనంలో ఉండలేకపోతే మెరుగ్గా చలనంలో ఉంచగలిగే రూపం రావాలి. ఉదాహరణకి వస్తుమార్పిడి అమ్మకం-కొనుగోలు అనే రెండు చర్యలుగా విడిపోయింది. ఈ కొత్తరూపం వస్తుమార్పిడిలో ఉన్న రెండు విరుద్ధాంశాల్నీ కొనసాగనిచ్చే రూపమే. అయితే, అమ్మకానికీ, కొనుగోలుకీ విభజన సంక్షోభానికి అవకాశం ఉంచుతుంది, అంటే అది వైరుధ్యాన్ని వైరుధ్యంగా తొలగించదు.
నిజమైన వైరుధ్యాలు పరిష్కారం అయ్యే పధ్ధతి
సరుకుల మారకంలో విరుద్ధమైనవీ, పరస్పరం ఒకదాన్నొకటి బహిష్కరించుకునేవీ అయిన పరిస్థితులు ఉంటాయి- అనే విషయాన్ని  ఇంతకుముందు ఒక అధ్యాయంలో  తెలుసుకున్నాం. సరుకు తదుపరి అభివృద్ధి ఈ వైరుధ్యాల్ని రద్దు పరచలేదు. సరుకులు మామూలు సరుకులుగానూ,డబ్బు గానూ విడిపోయినప్పటికీ, ఆ  పొసగని అంశాలు రద్దవలేదు. కాని వాటి  చలనాన్ని అడ్డగించే చిక్కులు తొలగిపోయాయి. ఆ అంశాలు సహనంతో సామరస్యంగా పక్కపక్కనే  ఉండడడానికి తగిన రూపం (modus vivandi) అభివృద్ధి అయింది. వస్తుమార్పిడి కొనుగోలూ, అమ్మకంగా వేరవడం వీలయింది. ఇలా వేరవడం వస్తుమార్పిడిలో ఉన్న  విరుద్ధాంశాల చలనానికి అవకాశం కలిగించింది.సాధారణంగా నిజమైన వైరుధ్యాలు సమన్వయం  (reconcile) చెయ్యబడే పధ్ధతి ఇదే.”
ఉదాహరణకి, ఒకవస్తువు వేరొకవస్తువు వైపు వస్తుందనీ, అదేసమయమయంలో దాని నుంచి దూరంగా
వెళ్లి పోతున్నదనీ వర్ణించడం ఒక వైరుధ్యమే. అయితే దీర్ఘ వృత్తం అనేది ఈ వైరుధ్యం సాధ్యమయ్యే, అలాగే సమన్వయమయ్యే  చలనరూపం. అంటే, అది ఈ వైరుధ్యం కొనసాగడాన్ని అనుమతిస్తూనే, అదేసమయంలో వైరుధ్యాన్ని సమన్వయపరుస్తుంది.  దీర్ఘవృత్తం కక్ష్య గురుత్వాకర్షణకీ, జడత్వానికీ  ఉన్న వైరుధ్యాల్ని ఎలా నడవ నిస్తుందో అలాగే.
నిజమైన వైరుధ్యాలు రద్దయి పోవు. ఎందుకంటే, అంతర్లీనంగా వున్నవైరుధ్యం అంటిపెట్టుకునే వుంటుంది. ఉదాహరణకి  ప్రత్యక్ష బార్టర్ అమ్మకంగానూ, కొనుగోలుగానూ  విడివడడం సంక్షోభాలను సాధ్యం చేసే రూపం – అది బార్టర్ లోని విరుద్దాంశాల్ని అనుమతిస్తుంది. అంతేగాని  అది వైరుధ్యాన్ని వైరుధ్యంగా తొలగించదు. సంక్షోభం కలిగే అవకాశాన్ని నిర్మూలించదు..
మరైతే, విడివడడంవల్ల ఒరిగిందేమిటి?

బార్టర్ లో ఇబ్బందుల్ని తొలగించేందుకు. మారకాలు సజావుగా సాగడానికి ఆటంకాలు ఏర్పడ్డాయి. వాటిని అధిగమించడానికి, మామూలు సరుకులుగానూ, డబ్బుగానూ సరుకులు విడివడిపోయాయి. బార్టర్లోని ఆటంకాలు పటాపంచలయ్యాయి.
డబ్బు తొలగించిన చిక్కులేమిటి?
బార్టర్ లో ఒకరు తనవస్తువు ఇచ్చి , మరొకరి వస్తువు తీసుకుంటాడు. ఇవ్వడానికీ పుచ్చుకోడానికీ ఐక్యత ఉంటుంది. ఒక చర్య ఒకేచోట జరగాలి. ఒకేకాలంలో జరగాలి. అదే వ్యక్తులమధ్య జరగాలి. అంటే వస్తుమార్పిడిలో ప్రదేశానికీ, కాలానికీ, వ్యక్తులకీ సంబంధించి పరిమితులుంటాయి. సరుకులు కొద్దిగా వున్న కాలంలో వస్తుమార్పిడి సమాజ జీవన క్రియకి సరిపోయింది. అయితే ప్రతి కొత్త శ్రమ విభజనతోనూ సరుకులజాబితా పెరిగింది. సంఖ్యా పెరిగింది. వస్తుమార్పిడి మారక అవసరాలకు సరిపోలేదు. ఇబ్బందులు తలెత్తాయి. అవేవంటే:
1. వస్తుమార్పిడి జరగాలంటే, అవతల మనిషి దగ్గర మనకు కావాల్సిన వస్తువు ఉంటేనే చాలదు. మన వస్తువు అతనికి కావలసినదై ఉండాలి. అది అతనికి ఉపయోగపు విలువ అయి ఉండాలి.
మనదగ్గర పాలున్నాయి. బదులుగా మనకి బియ్యం కావాలి. బియ్యం వున్నా ప్రతివానితోనూ మనకు మారకం కుదరదు.ఎందుకంటే పాలు వాళ్లకి అవసరం లేకపోవచ్చు. అప్పుడు మనం బియ్యం ఉంది పాలు కావాల్సిన మనిషిని వెదికి పట్టుకోవాలి. ఇదొక ఇబ్బంది.
దీనికి సంబంధించి ఒక ఉదంతం ఉంది:
ఒక అన్వేషకుడు ఆఫ్రికాలో ఒక నదిలో తిరగడానికి పడవకోనాలనుకున్నాడు. పడవ అమ్మేవాడిని పట్టుకున్నాడు. అయితే అతను పడవని దంతంతో తప్ప మార్చుకోడు.మనవాడి దగ్గర దంతం లేదు. కొంత వైరు మాత్రం ఉంది. దంతం ఉన్నవాడేమో బట్ట కావాలన్నాడు. ఇతని దగ్గర అదీ లేదు. మూడోవాడిని చూశాడు. అతను బట్టని అమ్ముతాడు, కాని వైరుకి మాత్రమే. మనవాడి దగ్గర కొంత వైరుంది. దాన్ని బట్టతో మార్చి,ఆబట్టనిచ్చి  దంతంతీసుకుని, ఆదంతం ఇచ్చి పడవ పట్టుకుపోయాడు.
ఇలా తిరగటం అసౌకర్యం కలిగిస్తుంది. టైం వేస్ట్ కూడా. మనవాడిదగ్గర వైరు ఉంది కాబట్టి పనయింది. ఒకవేళ వైరు లేకపోతే నువ్వా నువ్వా అంటూ తిరగవలసి వచ్చేది.

2. సరుకుల విలువ పరిమాణాల్లో తేడా వస్తుమార్పిడికి ఆటంకం అవుతుంది. ఒకని వద్ద మేక ఉంది. అతనికి 2 కుండలు కావాలి. కుండవానికి మేక అవసరమే. 1మేక = 100 కుండలు. రెండు కుండలతో మేక మారాలంటే, మేకని 50 ముక్కలు  చెయ్యాలి. కుండలవానికి మేక అవసరం మాంసం కాదు. పాలు. ఒకవేళ మాంసమే అయినా, ఒక ముక్కకే రెండు కుండలు వస్తాయి. మిగలిన ముక్కల్ని మారకం చేసుకోలేకపోతే అవి చెడతాయి.
కొన్ని వస్తువుల్ని విభజించగలిగినా, అవి విలువని కోల్పోతాయి. ఒక ముత్యం ఉన్న వాడికి అన్నం కావాలి. ఒకసారి తినే అన్నం కంటే ముత్యం ఎన్నో రెట్లు విలువైంది. ముక్కలు చేస్తే పాడవుతుంది, విలువ కోల్పోతుంది. పోనీ మొత్తానికీ అన్నం తీసుకుంటే అది ఎంతోసేపు నిల్వ ఉండదు.
ఇవి వస్తుమార్పిడిలో ఇబ్బందులు. డబ్బు రాగానే  ఈ ఇబ్బందులు పోయాయి.
డబ్బు ఈ ఇబ్బందుల్ని ఎలా పోగొట్టింది?
సరుక్కీ సరుక్కీ మధ్య  డబ్బు ఉంటుంది.ఇప్పుడు మారక రూపం:  సరుకు-డబ్బు-సరుకు. ఏసరుకైనా మొదట డబ్బులోకి మారుతుంది. ఆడబ్బు మరోకసరుకులోకి మారుతుంది.
సరుక్కీ సరుక్కీ మధ్యలో ప్రతిసారీ డబ్బు ఉంటుంది. డబ్బు మధ్యవర్తి పాత్ర పోషిస్తుంది.
మొదటి ఉదాహరణలో తన వైరుని రెండోవానికి అమ్మి ఆడబ్బుతో నేరుగా పడవ కొంటాడు.
         వైరు - డబ్బు- పడవ
మన ఉదాహరణ బార్టర్ లో అయితే:
వైరు – బట్ట ; బట్ట – దంతం ; దంతం - పడవ
కనక బార్టర్ లో కలిగే ఈ ఇబ్బందిని డబ్బు అధిగమిస్తుంది.

ముత్యం –ఆహారం మారకంవిషయం: ముత్యాన్ని ముక్కలు చేస్తే చెడుతుంది. ముత్యాన్ని అమ్మి ఆడబ్బుని  భాగాలు చేసినా విలువ తగ్గదు.కొంత డబ్బుతో ఆహారం కొని, మిగిలిన డబ్బుతో కావలసిన ఇతర సరుకులు కొనుక్కోవచ్చు.
కాలానికి సంబంధించిన ఇబ్బంది: ఒకరి వస్తువు మరొకరికి పరస్పరం కావలసినా, ఇద్దరి అవసరాలూ ఒకే సమయంలో ఉండక పోవచ్చు. రొట్టె వానికి బట్ట కావాలి. బట్టవానికీ రొట్టె కావాలి. కాని అప్పటికప్పుడు కాదు. కనుక బట్టవాడు మారకానికి ఒప్పుకోడు. కారణం: రొట్టె మర్నాడు తినేందుకు పనికిరాదు.

వస్తు మార్పిడి
( సరుకు-సరుకు)
డబ్బు మధ్యవర్తిగా మారకం
(సరుకు- డబ్బు- సరుకు)
1.ఎవరికిస్తామో వానివద్దే తీసుకోవాలి
ఎవరి వద్దయినా తీసుకోవచ్చు
2.ఏప్పుడిస్తామో అప్పుడే తీసుకోవాలి
ఎప్పుడయినా తీసుకోవచ్చు
3. ఎక్కడిస్తామో అక్కడే తీసుకోవాలి.
ఎక్కడయినా తీసుకోవచ్చు

వస్తు మార్పిడిలో ఉన్న స్థల కాల వ్యక్తి పరిమితులు డబ్బు మధ్యవర్తిగా ఉన్న మారకాల్లో ఉండవు.
మార్క్స్ మాటల్లో: “వస్తు మార్పిడిలో ఒకరి వస్తువు ఇవ్వడం, ఇంకొకరి వస్తువు పొందడం- అనే నేరు ఐక్యతని అమ్మకం కొనుగోలుల  వ్యతిరేకతలోకి విడగొట్టడం ద్వారా ప్రదేసనికీ, కాలానికీ, వ్యక్తులకీ సంబంధించి వస్తుమార్పిడి విధించిన పరిమితుల్ని చలామణీ అధిగమించింది.” కాపిటల్ 1.115
మరొకచోట: “వస్తు మార్పిడికుండే స్థానిక,వైయక్తిక హద్దుల్ని అధిగమించి మారకం సరుకుల చలామణీని అభివృద్ధి పరిచింది.”- కాపిటల్ 1.11

మారక రంగం నుండి వాడక రంగంలోకి
సరుకులు ఎవరికి ఉపయోగపు విలువలుగా ఉండవో వారి చేతుల్లోనుంచి ఎవరికి ఉపయోగపు విలువలో  వారిచేతుల్లోకి పోయే ప్రక్రియే మారకం. ఒకరకం శ్రమ ఉత్పాదితం మరొక శ్రమ ఉత్పాదితం స్థానంలోకి చేరుతుంది. ఇది సామాజిక జీవనక్రియ. ఉపయోగపు విలువగా ఉండే చోటుకి చేరాక, సరుకు మారకరంగం నుంచి నిష్క్రమించి, వాడకరంగంలో ప్రవేశిస్తుంది. వల కొన్నవాడు దాంతో నదిలో చేపలుపడతాడు. అంటే వల మారక రంగం వీడి వాడక రంగంలోకి పోయింది.
అయితే ప్రస్తుతానికి  మనద్యాసంతా మారక రంగం మీదే.
మారకాన్ని  రూపం వైపు నించి పరిశీలించాలి

శ్రమ విభజన ఉన్న ఏ సమాజంలోనైనా వస్తువులు ఉత్పత్తయ్యాక చేతులు మారితీరాలి. ప్రతి వ్యక్తీ తన శ్రమ ఉత్పాదితాల్ని వదులుకొని, ఇతరుల ఉత్పాదితాల్ని తీసుకోవాల్సిందే. ఇదొక సామాజిక జీవన క్రియ  (social metabolism).” ఉపయోగపు విలువలుగా వుండని వారి చేతుల్లోంచి, ఉపయోగపు విలువలుగా ఉండే వారిచేతుల్లోకి బదిలీ చేసే ప్రక్రియగా  ఉన్న మేరకు, మారక ప్రక్రియ సామాజిక జీవన క్రియ యొక్క ప్రక్రియ.”
ప్రతి సమాజంలోనూ ఈప్రక్రియ ఉత్పాదితాల మారకం ద్వారా జరరిగిందని కాదు. ఇక్కడ పరిశీలిస్తున్నది సరుకులు ఉత్పత్తిచేసే సమాజాన్ని. మార్క్స్ లక్ష్యం ఈ సమాజంలో ఈబదిలీ జరిగే సామాజిక రూపాన్ని పరిశీలించడమే ఈప్రక్రియ యొక్క సారం గురించి ఇక్కడ  ఆసక్తి లేదనీ, కుతూహలం అంతా దాని రూపం గురించే ననీ స్పష్టం చేస్తాడు. “మనం ఈ సామాజిక జీవన క్రియలో మాధ్యమంగా పనిచేసే సరకుల రూప పరివర్తన-లేక సరుకుల రూపాంతరాన్ని  గురించి పరిశోధించాలి.  కనుక మొత్తం మారక ప్రక్రియని దాని రూపం అంశంలో చూడాలి. అంటే, సామాజిక జీవనక్రియని జరిపించే సరుకుల రూపం మార్పుని /  రూప పరివర్తనని పరిశోధించాలి.

మార్కెట్ లావాదేవీల్ని  రూపం వైపు నించి చూసేటప్పుడు, ఒక పొరపాటు చెయ్యకూడదు. రెండు మామూలు సరుకుల మధ్య జరిగే  వస్తుమార్పిడి కి కొనుగోలు లేక అమ్మకం భిన్నస్వభావం కలవి. పాల్గొనే వ్యక్తుల ఆలోచనలూ, నిర్ణయించుకునే ప్రమాణాలూ (criteria)రెండు సందర్భాలలోనూ  భిన్నంగా ఉంటాయి.
ఈ చలనం యొక్క రూపం అంశం గ్రహించడం కొంచెం కష్టం. ఎందువల్లనంటే,ఒక సరుకు యొక్క ప్రతి రూపం మార్పూ రెండు సరుకుల మారకం ద్వారా వస్తుంది. వాటిలో  ఒకటి సాదా సరుకు,రెండోది  డబ్బుసరుకు. అలాంటి రూపం మార్పుకి ఉదాహరణ: ఒకసరుకు తన ఉపయోగపు విలువను వదలివేసి, డబ్బు రూపాన్ని తీసుకోవడం. ఇదెలా జరుగుతుంది?బంగారంతో దాని మారకం ద్వారా. ఒక  వాస్తవంగా చూస్తే  అది రెండు సరుకుల మారకం. అయితే మరింత దగ్గరగా చూడాల్సిన అవసరం ఉంది.
డబ్బు చలామణీ ప్రక్రియలో అనివార్యంగా  ఏర్పడ్డది.
ఒక సరుకు బంగారంతో మారింది అనే విషయాన్ని మాత్రమే మనస్సులో పెట్టుకుంటే, కచ్చితంగా గమనించాల్సిన విషయాన్ని వదిలేస్తాము. అదేమంటే, సరుకు రూపానికి ఏమి జరిగిందో దాన్ని పట్టించుకోము.
1) ఉత్త సరుకుగా ఉన్నప్పుడు బంగారం డబ్బు కాదు అనే విషయాన్ని గమనించం.
2)ఇతర సరుకులు తమ ధరల్ని బంగారంలో చెప్పినప్పుడు బంగారం ఆసరుకుల డబ్బు రూపమే-అనే విషయాన్ని పట్టించుకోము.
ఉదాహరణకి, ఒక పడవ = 2 గ్రాముల బంగారం
రెండు సరుకులూ రెండు భిన్న శ్రమల ఉత్పాదితాలని తెలిసిందే. మారకం జరిగితే, అవి చేతులు మారతాయి. పడవ ఉపయోగపు విలువగా లేని ఉత్పత్తిదారు నించి వినియోగదారుకి చేరుతుంది. అంటే అది మారక రంగాన్ని వదలి వాడకరంగంలోకి అడుగిడుతుంది. పడవ బంగారంతో మారింది అనే విషయాన్ని మాత్రమే గమనిస్తే ఆసరుకుల రూపంలో వచ్చిన మార్పుని గమనించం. అయితే ఇదే అసలు గమనించాల్సిన విషయం. బంగారం కూడా మామూలు సరుకే, పడవలాంటి సరుకే. అలా మామూలు సరుకుగా ఉన్నప్పుడు, బంగారం డబ్బుకాదు. అన్ని సరుకులూ బంగారంలో తమ ధరలు చెప్పినప్పుడు అది విశిష్టమైన సరుకు - డబ్బు సరుకు – అవుతుంది; ఇతర సరుకుల యొక్క డబ్బురూపం అవుతుంది.రూపాన్ని డబ్బులో వ్యక్తం చేస్తాయి.అలా ఇతర సరుకుల ధరల్ని వ్యక్తం చేసే మాధ్యమమే(medium) బంగారం. మిగిలిన ఏ సరుకూ అలాంటి మాధ్యమంగా ఉండజాలదు.

నాలుగో పేరా
సరుకులు మారక ప్రక్రియలోకి వచ్చేటప్పుడు అవి ఎలావున్నాయో అలానే ఉంటాయి అసలు ఆకారంలో వస్తాయి. మారకప్రక్రియ సరుకుని రెండు మూలకాలుగా సరుకుగా, డబ్బుగా - వేరుచేస్తుంది.ఆవిధంగా  సరుకులో ఉపయోగపు విలువ, విలువలమధ్య అంతర్గతంగా ఉండే విరుద్ధత (opposition) ఇప్పుడు దానికి అనుగుణమైన  సరుకు, డబ్బుల మధ్య  బాహ్య విరుద్ధతని కలిగిస్తుంది. ఈ విరుద్ధతలో సరుకులు ఉపయోగపు విలువలుగా డబ్బుని మారకం విలువగా ఎదుర్కుంటాయి. మరొకపక్క, ఈ విరుద్ధతకి రెండువైపులా ఉన్నవి సరుకులే, అయినందువల్ల ఉపయోగపు విలువ, విలువల ఐక్యతలే. అయితే ఈ విరుద్ధతల ఐక్యత రెండు వ్యతిరేక ధృవాల వద్ద వ్యక్తమవుతుంది. .ధ్రువాలు అయినందువల్ల అవి సంబంధంలో ఉన్నట్లే, వ్యతిరేకంగానూ ఉంటాయి. సమీకరణానికి ఒకవైపున మామూలు సరుకు, నిజానికి ఒక ఉపయోగపు విలువ ఉంటుంది. దాని విలువ దాని ధరలో ఉహాత్మకంగా వ్యక్తమవుతుంది. ధరద్వారా సరుకు (అవతలవైపునున్న) వ్యతిరేకి అయిన బంగారంతో సమపరచబడుతుంది. మరొకపక్క లోహమైన బంగారం విలువ అవతారంగా , డబ్బు హోదా పొందుతుంది. బంగారం బంగారంగా మారకం విలువే .
దాని ఉపయోగపు విలువ  ఉహాత్మకంగా మాత్రమే కనబడుతుంది. సరుకులవైన ఈ  విరుద్ధ రూపాలు వాటి మారకం జరిగే  ప్రక్రియ యొక్క నిజమైన చలన రూపాలు.

సరుకుల వ్యతిరేక రూపాలు మారక ప్రక్రియ యొక్క వాస్తవ చలన రూపాలు.

సరుకులు ఉపయోగపువిలువలుగా డబ్బుని ఎదుర్కుంటాయి. ఇరువైపులా ఉన్నది సరుకులే. అంటే ఉపయోగపు విలువ, విలువల ఐక్యతలే. అయితే ఈ వ్యత్యాసాల ఐక్యత ఆధ్రువం వద్దా, ఈద్రువం వద్దా వ్యతిరేక మార్గంలో ప్రాతినిధ్యం వహిస్తుంది. అందువల్ల అదే సమయంలో వాటి పరస్పర అంతఃసంబందానికి ప్రతినిధి అవుతుంది/ ప్రాతినిధ్యం వహిస్తుంది.
వేరేరకంగా చెబితే, పిప్పిపళ్ళలో కూరే బంగారం ఉపయోగపు విలువ ఉపేక్షించబడుతుంది. ఫ్రెంచ్ కూర్పులో సరుకుకీ డబ్బుకీ ఉండే సంబంధం ఏవిధంగా రెండు మామూలు సరుకులకి  ఉండే సంబంధానికి భిన్నమైనదో చక్కగా వివరిస్తాడు. 
ఒకధ్రువంలో బంగారం ఉంటుంది.అన్ని ఉపయోగకర వస్తువులూ ఇంకో ధ్రువాన్ని చేరతాయి. రెండు వైపులా ఉన్నవి సరుకులే. అటూ సరుకే ఇటూ సరుకే. రెండూ ఉపయోగపు విలువ, విలువల సమ్మేళనాలే. అయితే ఈరెండు చివరలా ఉన్న వ్యతిరేకాంశాల ఐక్యత రెంటిలో ప్రాతినిధ్యం వహిస్తుంది. ఆరెండూ ఒకదానికొకటి విలోమంగా ఉంటాయి. సరుకు ప్రయోజనకరరూపం దాని వాస్తవ రూపమే. దాని మారకం విలువ దాని ధర ద్వారా  ఉహాత్మక బంగారంలో వ్యక్తమవుతుంది. ఇందుకు విరుద్ధంగా బంగారం యొక్క ప్రాకృతిక, లోహ రూపం దాని సాధారణ రూపం, అంటే విలువ రూపం. దాని ఉపయోగపు విలువ దానికి సమానకాలుగా ఉన్న సరుకుల పరంపర(series)లో ఉహాత్మకంగా వ్యక్తమవుతుంది.ఆ కారణంగా ఒక సరుకు బంగారంతో మారినప్పుడు, తన ప్రయోజనకర  రూపాన్నిఅదేసమయంలో తన విలువ రూపంలోకి మార్చుకుంటుంది. బంగారం ఒక సరుకుతో మారినప్పుడు, తన విలువ రూపాన్ని ప్రయోజనకర రూపంలోకి మార్చుకుంటుంది.
ఈ సరుకు-డబ్బు బహిర్గత వ్యతిరేకత మారక ప్రక్రియలో ఏర్పడ్డది. ఈ సరుకు-డబ్బు బహిర్గత వ్యతిరేకత ప్రతి సరుకులోనూ ఉన్న ఉపయోగపు విలువ-విలువల అంతర్గత వ్యరేకతకు ప్రాతినిధ్యం వహిస్తుంది. ఈ సరుకుల వ్యతిరేక రూపాలు మారక ప్రక్రియ యొక్క వాస్తవ చలన రూపాలు.
ఉద్దేశ్యపూర్వకంగా ప్రవేశపెట్టబడిన సాధనం కాదు
అమ్మకంగానూ, కొనుగోలుగానూ బార్టర్ విడివడడం అనేది ప్రత్యక్ష వస్తుమార్పిడిలో తలెత్తిన ఇబ్బందుల్ని తొలగించడానికి మార్కెట్లో పాల్గొనే వ్యక్తులు ఉద్దేశ్యపూర్వకంగా ప్రవేశపెట్టబడిన సాధనం కాదు. డబ్బు ఎకానమీ కేంద్రం(core)లో ఉత్పత్తిసంబందాల ఉపరితల వ్యక్తీకరణగా ప్రవేశపెట్టబడింది. డబ్బు రాకతో ప్రతి సరుకులోనూ ఉపయోగపు విలువకూ, విలువకూ అంతర్గతంగా ఉన్న వైరుధ్యం, సరుకులు మామూలు సరుకులుగానూ, డబ్బుగానూ విడివడడంలో బహిర్గతమయింది.
సరుకు మారకప్రక్రియలో నడచేటప్పుడు, సరుకు ఈరెండు వ్యతిరేక సరుకు రూపాలగుండా పోతుంది.
డబ్బు-మామూలు సరుకు  గురించి చర్చించాక, అసలు ప్రక్రియని చర్చిస్తాడు:
అసలు ప్రక్రియ- కొనడం కోసం అమ్మడం

నేతగాడు తాను నేసిన 20గజాల బట్టతొ  మార్కెట్ కి పోతాడు. ఆ బట్టకి నిర్దిష్టమైన ధర-రెండు పౌన్లు- ఉంటుంది. అంతకే దాన్ని అమ్మి, అంతే ధర ఉన్న బైబిల్ కొంటాడు. బట్ట అతని దృష్టిలో విలువ నిక్షేపం మాత్రమే. దాన్ని బంగారంతో మారకంలో పరాధీనం చేస్తాడు. బంగారం బట్ట యొక్క విలువ రూపం. ఈ రూపాన్ని మరొక సరుకు అయిన బైబిల్ కోసం వదులుకుంటాడు. బైబిల్ కుటుంబానికి ఉపయోగపువిలువగా అతని ఇల్లు  చేరుతుంది.
అప్పటికి మారకం వాస్తవంగా పూర్తవుతుంది. మారకం వాస్తవం అవడం  రెండు రూపాంతరాల (metamorphoses) ద్వారా సాధ్యం అవుతుంది. ఈరెండు రూపాంతరాలూ ఒకదానికొకటి విరుద్ధమైనవి. అయినా పరస్పరం అనుబంధ స్వభావం కలవి.   మొదటి రూపాంతరం , సరుకు డబ్బులోకి మారడం- 20గజాల బట్ట 2 పౌన్ల లోకి మారడం. రెండో రూపాంతరం ,ఆ రెండు పౌన్ల డబ్బు తిరిగి  బైబిల్ అనే మరొక సరుకులోకి మారడం. ఈరూపంతరం లోని రెండు దశలూ నేతగాడు జరిపిన రెండు భిన్న లావాదేవీలు.తొలి దశ అమ్మడం-తన సరుకుని డబ్బుకి మారకం చెయ్యడం. మలి దశ కొనడం-తన డబ్బుని సరుకుతో మారకం చెయ్యడం. రెంటినీ కలిపితే ‘కొనడం కోసం అమ్మడం’.

నేతగాని లావాదేవీ ఫలితం ఏమిటి? అతని వద్ద బట్ట బదులు బైబిల్ ఉంది.తన అసలు సరుకు పోయి, అంతే  విలువగల, భిన్నమైన ఉపయోగపు విలువ ఉన్న మరొక సరుకు అతనిదయింది. ఇదే పద్ధతిలో అతను జీవితావసర వస్తువుల్నీ, ఉత్పత్తి సాధనాలనీ సమకూర్చుకుంటాడు. ఈ దృష్టితో చూస్తే, ఈ మొత్తం ప్రక్రియ ఫలితం ఏమిటి? అతని శ్రమ ఉత్పాదితం వేరొకరి శ్రమ ఉత్పాదితంతో మారకం కావడమే. ఉత్పాదితాల మారకం మినహా  మరేమీ కాదు. అందువల్ల సరుకుల మారకం వాటి రూపంలో ఈక్రింది మార్పుల్ని తెస్తుంది:
సరుకు – డబ్బు – సరుకు  
స – డ – స 
ఆవస్తువులకి సంబంధించినంత వరకూ మొత్తం ప్రక్రియ ఫలితం, స – స. ఒకసరుకుకి మరొక సరుకుతో మారకం. వస్తు రూపం పొందిన సామాజిక శ్రమ యొక్క చలామణీ. ఈ ఫలితం వచ్చీ రాగానే ప్రక్రియ ముగుస్తుంది.
సరుకు రూప పరివర్తనలో రెండు దశలుంటాయి :
మొదటి దశ రుకు-బ్బు. సరుకు డబ్బుగా మారడం.
రెండో దశ బ్బు-రుకు ఆడబ్బు మరొక సరుకుగా మారడం.
మొదటి దశ గురించి వచ్చే పోస్ట్ లో